shrImUkapa~nchashatI (4.61-4.75)

[Guest guest]

... shrIkAraNaparachidrUpAyai namaH ..

 

Ashcharyamamba madAnAbhyudayAvalambaH

kAmAkShi cha~nchalanirIkShaNavibhramaste .

dhairya.n vidhUya tanute hR^idi rAgabandha.n

sha.nbhostadeva viparItatayA munInAm .. 61 ..

 

jantoH sakR^itpraNamato jagadIDyatA.n cha

tejAsvitA.n cha nishitA.n cha mati.n sabhAyAm .

kAmAkShi mAkShikajharImiva vaikharI.n cha

lakShmI.n cha pakShmalayati kShaNavIkShaNa.n te .. 62 ..

 

kAdambinI kimayate na jalAnuShaN^ga.n

bhR^iN^gAvalI kimurarIkurute na padmam .

ki.n vA kalindatanayA sahate na bhaN^ga.n

kAmAkShi nishchayapada.n na tavAkShilakShmIH .. 63 ..

 

kAkolapAvakatR^iNIkaraNe.api dakShaH

kAmAkShi bAlakasudhAkarashekharasya .

atyantashItalatamo.apyanupArata.n te

chitta.n vimohayati chitramaya.n kaTAkShaH .. 64 ..

 

kArpaNyapUraparivardhitamamba moha\-

kandodgata.n bhavamaya.n viShapAdapa.n me .

tuN^ga.n chhinattu tuhinAdrisute bhavatyAH

kA~nchIpureshvari kaTAkShakuThAradhArA .. 65 ..

 

kAmAkShi ghorabhavarogachikitsanArtha\-

mabhyarthya deshikakaTAkShabhiShakprasAdAt .

tatrApi devi labhate sukR^itI kadAchi\-

danyasya durlabhamapAN^gamahauShadha.n te .. 66 ..

 

kAmAkShi deshikakR^ipA.nkuramAshrayanto

nAnAtaponiyamanAshitapAshabandhAH .

vAsAlaya.n tava kaTAkshamamu.n mahAnto

labdhvA sukha.n samAdhiyo vicharanti loke .. 67 ..

 

sAkUtasa.nlapitasa.nbhR^itamugdhahAsa.n

vrIDAnurAgasahachAri vilokana.n te .

kAmAkShi kAmaparipanthini mAravIra\-

sAmrAjyavibhramadashA.n saphalIkaroti .. 68 ..

 

kAmAkShi vibhramabalaikanidhirvidhAya

bhrUvallichApakuTilIkR^itimeva chitram .

svAdhInatA.n tava ninAya shashAN^kamaule\-

raN^gArdharAjyasukhalAbhamapAN^gavIraH .. 69 ..

 

kAmA.nkuraikanilayastava dR^iShTipAtaH

kAmAkShi bhaktamanasA.n pradadAtu kAmAn .

rAgAnvitaH svayamapi prakaTIkaroti

vairAgyameva kathameSha mahAmunInAm .. 70 ..

 

kAlAmbuvAhanivahaiH kalahAyate te

kAmAkShi kAlimamadena sadA kaTAkShaH .

chitra.n tathApi nitarAmamumeva dR^iShTvA

sotkaNTha eva ramate kila nIlakaNThaH .. 71 ..

 

kAmAkShi manmatharipu.n prati mAratApa\-

mohAndhakArajaladAgamanena nR^ityan .

duShkarmaka~nchukikula.n kabalIkarotu

vyAmishramechakaruchistvadapAN^gakekI .. 72 ..

 

kAmAkShi manmathariporavalokaneShu

kAnta.n payojamiva tAvakamakShipAtam .

premAgamo divasavadvikachIkaroti

lajjAbharo rajanivanmukulIkaroti .. 73 ..

 

mUko viri~nchati para.n puruShaH kurUpaH

ka.ndarpati tridasharAjati ki.npachAnaH .

kAmAkShi kevalamupakramakAla eva

lIlAtaraN^gitakaTAkSharuchaH kShaNa.n te .. 74 ..

 

nIlAlakA madhukaranti manoj~nanAsA\-

muktAruchaH prakaTakandabisAN^kuranti .

kAruNyamamba makarandati kAmakoTi

manye tataH kamalameva vilochana.n te .. 75 ..